本屆政府志大才疏，施政一味假大空，大型基建如西九文化區、港珠澳大橋、高鐵香港段等，無不搞到一鑊泡：西九文化區至今淪為造價四百七十一億元嘅大白象；港珠澳大橋一波三折，至今通車無期；高鐵香港段工程亦一拖再拖，高鐵願景或成空。
香港嘅奇迹正在一項一項咁消失，以前被公認的高效、世界一流亦一樣一樣咁褪色，香港睇來已經冇乜值得驕傲矣！
西九文化區，老朽身邊好多搞文藝工作嘅朋友話齋：西九起好睇怕都唔到我哋用喇！其神傷處，老朽只能安慰佢「節哀順變」，聽其自然。至於高鐵，如果追加撥款冇咁多阻滯，「一地兩檢」唔膠着，也許有機會享用到啩。
內地官媒對高鐵香港段一拖再拖都感到憂心，發表文章直指高鐵可令香港連接內地十六個大城市，融入國家「四橫四縱」高鐵網，享受因此帶來的龐大人流及商機。若然高鐵一旦爛尾收場，除了先前投入嘅六百五十億元付諸流水，還會造成數百億元嘅善後損失，而且一旦爛尾，香港呢個國際都會顏面何存？
老朽記得早年立法會通過高鐵項目撥款不久，港鐵即急不及待推出一系列「港鐵為你接通未來每一程」，其中一輯「囡囡篇」，廣告雖唔見「高鐵」兩字，畢竟已使老朽神為之奪，好似見到林志玲露出驕人事業線咁震撼：孖女嘅生活多姿多采，做阿媽嘅帶着佢哋搭港鐵去學習烹飪、游泳、繪畫和體操，睇吓邊樣叻啲，最後孖女將乘搭「超快火車」去上海參加體操比賽。
如今諗起都悲傷，「四橫四縱」變咗盲頭烏蠅四圍撞，搭「超快火車」去上海參加體操比賽冇望，不如六月中先搭飛機去上海迪士尼樂園玩轉吧！