政情：阿柴棄選立會惹戀殖疑雲
民主黨（白鴿黨）早前公布五大地方直選及超級議席內部甄選報名名單，被視為香港島直選熱門參選人嘅「乳鴿」南區區議員柴文瀚（阿柴），最終未有報名，據知表面原因係想專注地區工作。但有消息指，阿柴棄選立法會嘅原因係「戀英」，唔捨得放棄其英國護照。
阿柴棄選立法會嘅消息傳出，令黨內中人百思不得其解，有白鴿黨中人透露，阿柴事前根本毫無迹象唔想選立法會，對方既參加黨內政治領袖計劃，又頻頻開記者會見傳媒，白鴿黨多名「老鴿」於去年十一月區議會換屆選舉亦瞓身為其拉票。有白鴿黨中人直言，若然阿柴一早另有打算，無意參選可以早啲知會黨友，唔使大家白費心機。
話地區做事滿足感較大
阿柴回覆查詢時承認，一直持有英國護照，但表明唔參選立法會，同持有英國護照一事無關，再三強調為地區做實事嘅滿足感較大。