政情：工記撐泛民 有人斥違諾

小組尋日召開首次會議及選舉正副主席，代表工商界嘅飲食界張宇人同獲得勞工界支持嘅民主黨單仲偕參選主席，各自得到十二票支持，最終抽籤抽中單仲偕勝出，之後副主席一職則由工聯會嘅鄧家彪當選，標誌勞工界喺取消強積金對沖問題上先勝一仗。

事後張宇人批評工聯會違背承諾，聲稱工商界議員早前同工聯會達成協議，由勞工界議員出任有關標準工時嘅小組委員會主席，佢哋就做強積金對沖小組主席，但最後工聯會卻倒戈「過票」畀泛民，將佢哋「蹺起」。

嫻姐反駁：冇應承過

但工聯會陳婉嫻就反駁，的確曾有中間人向佢哋提出有關協議，但工聯會冇應承過，反轟張宇人嘅說法係一種侮辱！

至於「漁人得利」嘅單仲偕就話，佢亦聽過有關協議，但唔知雙方係咪已經傾掂數，加上有關協議根本同泛民無關，因此未有深究。