人民力量議員陳偉業（大舊）突然爆料指，九十年代陳方安生（民主阿婆）擔任經濟司與兩電談判，「畀人過咗一戙」，連累市民需要繳交高昂電費，但民主阿婆之後照樣可以升官至政務司司長。
環境局副秘書長劉明光回應指，九十年代嘅兩電利潤管制協議，主要同財務及會計有關，因此由當時嘅經濟科負責，但依家就要考慮埋環保同可再生能源角度，於是改由環境局負責，答咗等於冇答。撥款最後獲全票通過，但連同上次會議已經傾咗成兩個幾鐘。
小組之後討論建築署建議重訂七個跨專業總建築師常額職位為指定職系職位嘅建議，有關改動並不涉及增加職位及開支，不過班議員照舊係問題多，拉布拉到完會仍未能進行表決。