政情：醫委改革 泰多關卡
醫務委員會改革再起風雲！港府早前決定吸納自由黨張宇人提出嘅改革醫委會私人草案，包括將委員會內嘅非業界委員數目，由現時嘅四人倍增至八人，以改變醫委會被指「醫醫相衞」嘅問題。建議一如所料惹來醫學界、尤其係私家醫生嘅反彈，其中醫學會會長史泰祖尋日開出底牌，一方面話唔反對增加非業界委員數目，但另一方面又希望最終能夠維持醫委會內，委任與選舉產生嘅委員各佔一半嘅比例。有分析指醫學會今次「忽然民主」，其實旨在拖垮整個醫委會改革。
醫學會謀換湯不換藥
醫委會一直被指過分維護醫生利益，包括處理醫生嘅專業失德投訴歎慢板，審批境外醫生來港執業又關卡重重，底因係現時醫委會廿八名委員當中，有多達廿四人都來自醫學界，其中七人由私家醫生主導嘅香港醫學會選出，另有七人由全港註冊醫生直接一人一票選出，兩者加起嚟佔全體委員數目一半，被視為反對改革嘅「死硬派」。
由於公眾同病人組織對改革醫委會嘅聲音強烈，醫學界點都唔敢公開反對增加非業界委員嘅建議，惟有使出其他陰招暗中阻撓。今次以醫學會為首嘅醫生組織，提出要維持醫委會委員一半委任、一半經選舉產生嘅比例，潛台詞係政府想新增四名由委任產生嘅非業界委員，亦必須同步增加四名由業界選出嘅委員，令醫委會由醫生主導嘅基本格局不變，改革變成「換湯不換藥」。
提「民主訴求」勢拖垮
另一個可能方案係，新增嘅四名非業界委員，有兩人要經選舉產生，但問題係點選呢？唔通要快過特首同立法會實行全民普選，全港三百多萬合資格選民一人一票選醫委？無論喺政治上或實際上都冇可能做到。最重要嘅係，原本支持改革醫委會嘅泛民議員，好難公開反對醫學會嘅「民主訴求」，變相分化咗改革草案嘅支持票，隨時會將整個改革拖垮。睇吓本身係骨科醫生嘅食物及衞生局局長高永文，今次有乜方法拆彈？