中環出更：慳錢買樓 郭偉強午餐吔麥記
立法會勞工界議員郭偉強今年三月「升呢」為爸爸，同一時間亦面對「男人之苦」，就係置業同供養BB嘅壓力，事關今年九月立法會換屆選舉能否連任仍屬未知之數，就喺多重壓力之下，郭偉強尋日於立法會被發現要食「麥記」當午餐，其助理將快餐裝進一個公文袋，然後交畀正在立法會前廳嘅郭偉強，莫非郭偉強已到財政壓力爆煲邊緣？
「夠畀首期 唔夠裝修」
郭偉強去年二月同太太結婚，此後一直同家人同住，佢透露一直都有置業計劃，更希望BB出世後就搬入新居，不過其置業夢要暫時延遲，據知原因係「有錢畀首期，冇錢裝修」，加上樓價仍有下調空間，因此決定再觀望多一陣。
當問及萬一立法會換屆選舉連任失敗，會否有「Plan B」，郭偉強稱要開始考慮呢個問題，又爆料指自己所屬嘅工聯會要求議員必須係全職擔任，因此都很難搵「外快」喎。
卓妮