中環出更：留守議廳 樹根餵象哥食花生
立法會尋日恢復二讀辯論版權修訂條例草案，泛民議員繼續拉布，「朝十一晚八」嘅會議合共廿七次點算法定人數，共浪費約四小時會議時間，一批建制派議員為免流會，都坐定定留守會議廳。而拉布之下嘅眾生相亦極富娛樂性，其中民建聯鍾樹根忽然拎出一大包花生同黨友分享，並主動將花生餵入黨友、進出口界議員黃定光（象哥）口中，非常溫馨。
去年十月立法會復會至今前後三次流會，泛民仍未有迹象會停止點人數拉布，建制派為咗反拉布就各師各法，一袋二袋拎入會議廳長期作戰。
EQ備參茶提神抗拉布
建制派議員葛珮帆（EQ）笑稱，自己「偷運」咗大豆茶同花旗參茶入會議廳，又話大豆茶補血、花旗參茶提神。
另一議員蔣麗芸（Ann）則指，若然遇上唔想聽到嘅發言，就會戴上耳機聽音樂；保險界議員陳健波更表明，已有打算盡量唔離開會議廳，因此帶咗電腦及充電器，亦帶咗大量文件去處理。
泛民議員幾乎五分鐘點一次人數嘅頻率，亦令建制派要諗計點樣醫肚，其中工聯會黃國健大嘆一餐飯分三次食，擔心長遠有腸胃問題；飲食界議員張宇人自爆因為多次來回餐廳同會議廳，漏帶銀包無錢找數，好在立法會餐廳願意賒住先，否則差啲就要洗碗填數。佢又講笑話，自己依家有個日本名，叫「騰上騰下」，並否認有食霸王餐，只係遲少少找數。
此外，商務及經濟發展局局長蘇錦樑會後都「搞埋gag」，表示尋日係大寒，出面非常寒冷，而版權法亦進入咗「冰封時期」，不過大寒之後就係立春，希望可以畀市民一啲希望同溫暖，唔知泛民議員能否領會蘇錦樑嘅用意？
卓妮