政情：建制泛民 區會鬥冧友
全港十八區區議會議事文化有「立法會化」嘅迹象！泛民主派於上個立法年度成功突襲，喺立法會財務委員會轄下兩個小組委員會取得主導權，建制派於本年度隨即反擊「冧友」加入委員會，希望以人數優勢確保唔會再「甩轆」，殊不知呢個「冧友文化」蔓延到新一屆區議會，並於建制泛民人數相若嘅沙田區議會率先上演，據知建制廿人及泛民十九人全數加入區會七個委員會，加上多名泛民新面孔嘅取態似乎較為激進，隨時愈玩愈激掟嘢都唔定，若然日後連流會都當食生菜，政府官員未來於具爭議性議題向兩級議會闖關，認真要有長期作戰嘅準備嘞！
立法會近年討論嘅議題被指「區議會化」，殊不知原來係雙向影響，十八區區議會議事文化亦「立法會化」，最明顯嘅例子係沙田區議會，事關建制派連同鄉事派有廿人，力壓泛民十九人，於重要議題如有個別建制派未有現身，泛民就有機會突襲成功，最新連區會轄下七個委員會都成為雙方惡鬥嘅新戰場。
沙田選七主席 泛民虎視眈眈
有當區泛民區議員透露，下周三區議會轄下七個委員會將會選主席，泛民已將之等同爭奪區會主席般重視，全數加入所有委員會，包括新民主同盟丘文俊、獨立泛民麥潤培、陳國強等，迫使建制派同樣要「冧友」力保各委員會控制權，沙田區議會主席、公民力量何厚祥承認，過往的確唔係每個委員會都全數議員加入，基於未來區會工作好具挑戰性，所以佢有鼓勵建制派議員盡可能加入委員會。
但咁樣做非一勞永逸，如選舉委員會主席後有多於一名建制議員退出，控制權即時拱手相讓畀泛民，再者委員會會議法定人數需為全體成員一半，換言之開會最少要廿名議員坐定定，兩邊陣營「鬥冧友」，一旦其中一方拉隊離場，似乎客觀效果係增加流會嘅風險，沙田區議會副主席彭長緯稱稍後有意就此與泛民進行商討。
深水埗譚國僑轟張永森違例
除此以外，深水埗區議會係另一個受到「立法會化」影響嘅區份，事關建制派與泛民於當區係十二對十一，形勢極之緊湊，最新於選出各委員會主席一事更鬧出風波，民協區議員譚國僑不滿區議會主席張永森將各個委員會主席提名截止時間，提早至開會前嘅一個半小時，批評違反《區議會條例》，不符程序公義，表明保留提出司法覆核嘅權利，張永森則於截稿前未有回覆查詢，由此觀之，未來特別係建制泛民勢均力敵嘅區會，都會繼續惡鬥連場！