中環出更：倡鄉議局組黨 侯強被「秒殺」
新界鄉議局近年屢次傳出要另起爐灶、組黨參選，但至今只聞樓梯響。出名勇猛嘅上水鄉事委員會主席侯志強（侯強），尋日就搶閘喺鄉議局例會上提出臨時動議，建議組黨出戰立法會選舉，仲連黨名都已經諗埋，叫「新界進步聯盟黨」，簡稱「新進聯」喎，獲全場鄉紳熱烈拍掌讚好，但亦有人大嗌「個名可唔可以好少少」。
侯強喺發言中解釋，近年嘅丁屋僭建同丁權爭議等風風雨雨，好多鄉紳都敢怒不敢言，佢認為新界人唔應該任人魚肉、有冤無路訴，要有人企出嚟講吓嘢，希望從新界廿七鄉入面搵出召集人負責組黨，兵分新界東、新界西兩路出選。
會議紀錄都無得落
不過，錦田鄉委會主席鄧賀年提出，根據《鄉議局條例》，鄉議局係一個法定諮詢機構，唔可以自行組黨，只能喺鄉議局轄下嘅選舉工作委員會跟進，將侯強嘅組黨動議「秒殺」。佢之後仲話，有關討論連會議紀錄都唔應該落。但鄧賀年最後都補充番句，如果侯強自行宣布參選，佢一定會支持。
卓妮