中環出更：品牌路辛酸 名人屢遇騙
要成為一個深入民心嘅本地品牌絕對唔容易，並非一時三刻就可以做到，早前一班本地品牌負責人聚首一堂，成立名為「香港人撐香港品牌」群組，建立一個平台互相支持，其中鴻福堂主席謝寶達透露，當年幾乎咩行業都做過，最終經營涼茶舖中跑出，連裝修都落手落腳做；談及創業辛酸史時，好多人都感同身受，而且都試過畀人呃添。
當日活動有好多唔同行業嘅前輩及新人出席，包括有份主理群組嘅E-print營運總監陳剛雄（Chris）、時昌迷你倉創辦人時景恒、遵理學校主席梁賀琪、彩豐行創辦人楊振源及開創「西餐懶人包」嘅食肆創辦人廖俊杰等。
陳剛雄畀拍檔呃股份
講到創業過程中嘅辛酸史，發現原來好多人都試過被騙，其中一個個案就發生喺Chris身上。Chris憶述，自己當年開咗一間印刷公司，上咗軌道略有名氣，點知畀拍檔呃咗大部分股份，最終要與同行另一間公司合作，佢先有機會東山再起。
海產商Ocean Three創辦人何智聰亦有類似經歷，當年被騙後有一批貨「砸住咗」，因而要硬住頭皮逐個朋友打電話同喺網上tag晒佢哋，諗盡方法散貨，好在柳暗花明又一村，成功清貨之餘，仲變成依家主力生意範圍。
至於「洗樓王」創辦人王嘉源亦曾面對生意逆境，透露當年賣電話卡賣唔出，周圍派傳單，整整吓其他人都搵佢幫手派，於是變埋佢正職添。
外界認為同行如敵國，但從另一個角度嚟講係「同坐一條船」，梁賀琪話於本港做教育尤其補習，最大困難係好多時同行有負面新聞，市民就會以為係同一間，一竹篙打一船人喎。
卓妮