政情：陳恒鑌成功爭取再做老竇
立法會議員陳恒鑌（Ben）本身已經有個囡，但一直想追多幾個，依家終於願望成真，佢太太有咗喇！預產期係三月，即係應該猴年出世。至於係細路定係細妹，阿Ben就話等出咗世先公布。
想追多幾個 要問過老婆
阿Ben向來嚮往大家庭有幾個小朋友，但由於自己太忙同驚養唔掂，所以搞到依家先成功爭取生多個。佢揚言未來會繼續爭取生幾個，但係同太太就分歧好大，陳太表明自己嘅愛心只有兩個，要凝聚共識有好大難度喎。
談及太太點樣調理身子，阿Ben直言唔使佢同太太諗，因為佢媽媽同外母好緊張呢啲嘢，並大讚外母成日煲湯畀太太飲，照顧得好好，希望太太感覺良好，易啲氹掂佢再生多個！阿Ben又話，即將「升呢」做家姐嘅囡囡不但冇呷醋，仲每日都幫BB改唔同嘅名，一時叫陳子恒，一時叫陳子鑌。有個「子」字喎，睇嚟都係細佬居多！