金管局總裁陳德霖早前交出堪稱史上最差嘅成績表，去年第三季外匯基金投資勁蝕六百三十八億元，令人擔心最終去年全年外匯基金會蝕錢「見紅」收場。言猶在耳，財政司司長曾俊華（鬍鬚曾）疑吹淡風做定期望管理，形容香港外匯基金受到環球市場波動等「三重打擊」，雖然於去年十月份單月基本收復之前失地，惟最後兩個月市況又變差，預告外匯基金「全年總結難言樂觀」。鬍鬚曾為外匯基金埋單計數戴定頭盔，莫非真係蝕到無眼睇？
