現年六十四歲嘅行政會議召集人林煥光，至今做咗四十年公務，換言之佢有六成嘅時間都奉獻咗畀公務，佢早前接受馬會刊物訪問時就首次萌生退意，表明應該係時候退下來，而太花時間嘅公務未必會再做；佢又形容，自己係唔能夠hea嘅人，幸好有好多興趣，包括鍾意睇書同睇電影，因此一定不會悶。
林煥光畢業後首份工作於銀行，其後考到政務官加入政府，佢自爆如當年無加入政府，可能繼續做銀行，因為七十年代於銀行打工係最有前途嘅職業。佢又以當年任荃灣政務專員處理收地問題為例，表示身為政府官員，職責就係處理矛盾，強調惟有認清矛盾，才可收窄分歧。
林煥光亦與賽馬一早有淵源，佢透露父親係馬迷，以前每逢跑馬日，「家中一定有馬經」，當時小朋友唔可以入馬場，就喺跑馬地中央公園隔着欄邊看。佢又認為，賽馬係thinking game，亦是智力遊戲，用哲學角度睇其實與人生十分相似，皆因勝負均受很多因素影響。