施政報告提出預留二十億元成立創科創投基金，以一對二嘅配對形式，與私人風險投資基金共同投資，之不過基金細節未出，外界就擔心於科技界活躍多時嘅創新及科技局局長楊偉雄，日後於審批時會否偏頗某一方，甚或捲入利益衝突疑雲。
楊偉雄尋日為力撐基金順利開設，不惜自嘲有朋友無老友，似乎有提早「拆彈」之意。佢尋日出席電台節目，再次就創科創投基金解畫，指這項配對形式並非香港首創，局方會盡量做到更加公開同透明，讓公眾唔會覺得有任何利益輸送出現。
對於施政報告提出預留二十億元，以投資收入資助院校將科研成果產品化，外界有指可以釋除有傳港府高層曾指商界唔好捐錢畀大學嘅疑慮。
曾任理工大學副校長嘅楊偉雄話，自己亦都做過募捐工作，好多善長仁翁捐錢都有種種原因，大家唔使揣測咁多，亦唔應該將兩者拉埋一齊睇喎。