政情：吳克儉晒命：外遊仲辛苦
主責教育嘅教育局局長吳克儉（吳得掂）上任三年半，外訪次數一年比一年多，去年外訪次數增至十五次，平均每個月外訪最少一次，目的地遍及美國、比利時等歐美國家，之不過畀人質疑外訪大過天嘅吳得掂，尋日仲要火上加油，竟然話「外訪仲辛苦過自己喺香港裏面嘅時間」，加上吳得掂曾於二○一三年口快快，一度自爆外訪當做放假，既然吳得掂對外訪咁情有獨鍾，不如離開官場全程外訪周遊列國，到時想去遊山玩水幾耐都無人會反對嘞！
稱「辛苦過喺香港」
吳得掂任內經常外訪離港一直為人詬病，被譏諷不如「搵份工周遊列國」，最近港府高官去年外訪資料出爐，吳得掂外訪次數增至新高十五次，外訪總開支較去年有所減少，不過咪以為吳得掂知衰有所收斂，佢尋日接受電視台訪問時，被問及外界質疑外訪太多唔重視本地教育時，竟然反問「咩叫做多」，其後更話「外訪仲辛苦過自己喺香港裏面嘅時間」，事關外訪時要兼顧埋香港嘅事務，又死撐去年十五次外訪，部分其實係即日來回喎。
吳得掂其後再合理化「外訪辛苦論」，聲稱要佢親自外訪，原因之一係到訪當地後，攞到嘅當地資料係全面好多，即時就攞得到咁話。佢其後疑無視有業界批評免費幼稚園教育政策「唔湯唔水」，竟然聲稱如果佢唔係有就此外訪，可能免費幼稚園教育嘅政策都冇咁快做到︰「好多地方用十幾年做，我哋（外訪完）睇番嚟係兩年」。
即日來回 僅為觀禮
吳得掂嘅「外訪辛苦論」究竟幾有根據，答案係根本站唔住腳，一則係做得問責局長月薪近三十萬元，無論外訪或離港都應急市民所急；其次，吳得掂過去三年外訪目的地，巧合地歐美等多個國家都輪流上榜，即使係到內地訪問，例如去年十一月即日來回出席全國大學生課外學術科技作品競賽決賽開幕式，如果只係單純睇個活動性質，究竟有幾辛苦，答案不言而喻。
查實外界緊張外訪成效，底因係由公帑支付，如果吳得掂有外訪辛苦過喺香港嘅心態，係咪應該趁機諗吓，仲適唔適合於官場死撐下去呢？