中環出更：旅業內訌自由黨插自己友
旅遊業界近日因旅遊業議會嘅加強監管措施爆發內訌，香港旅遊從業員聯會榮譽會長林少麟仲話要搞司法覆核同千人遊行，擺明同旅議會開戰。不過佢此舉就令自由黨亂晒龍，皆因林少麟同佢戰友、旅遊促進會總幹事崔定邦都係自由黨黨員，搞到自由黨要特登出聲明撇清關係。不過原來自由黨矇查查，起初並唔知林少麟係自己友。林少麟就揚言，唔滿意可以踢佢出黨喎。
據悉，原來崔定邦代表自由黨輸咗區議會選舉後已辭去黨內職務，只維持黨員身份。今次旅遊業內訌鬧到咁大，自由黨都有向崔定邦詐型，點知崔定邦就話自己唔係自由黨職員，今次亦非用自由黨身份行事。而自由黨之後更發現，原來林少麟都係黨員，只係一直唔活躍。
劃清界線 免燒埋零售界
林少麟就話，發起不合作運動前冇同黨溝通係有疏忽，但就認為行動唔會影響黨嘅聲譽，對業界亦都有益，仲話如果唔滿意，可以踢佢出黨。
自由黨咁緊張，出聲明同兩人撇清關係，仲表明會支持旅議會，其實講到底都係因為批發及零售界立法會議員方剛打算交棒畀該黨副主席邵家輝，擔心林少麟同崔定邦惹嘅火頭會燒埋零售界，影響該黨交棒啫。
卓妮