中環出更：樂善好「施」 企業正能量
最近香港經濟環境受外圍經濟影響，被指陸續有轉角現象，一眾慈善團體都為籌款出盡法寶，其中九龍樂善堂尋日於沙田馬場舉行盃賽，主席梁紹安就話籌款嘅嘢好難每年比較，以今年嘅經濟情況嚟講，大家都仲咁支持算係好難得；副主席楊小玲亦對此感到樂觀，話中小企最近生意唔好就更加需要宣傳，與其就咁擺舊錢賣廣告，不如攞嚟做善事，一樣可以增加曝光率，而且對企業形象同知名度都有正面影響，變得更有意義添！
尋日樂善堂一班董事局成員包括副主席施家殷（Kyran）、總理蘇裕康及太太廖嘉麗等一早到場，安老事務委員會主席陳章明等人亦有出席。講開籌款及本港經濟情況，於內地經營大型洗滌生意嘅Kyran話，其實唔係所有行業情況都咁惡劣，好似呢期人民幣弱勢對佢嚟講並非壞事，加上呢個行業於內地屬於「起飛工業」，所以需求愈來愈大。
助少數族裔融入社區
生產有機嬰兒用品嘅蘇裕康情況亦類似，佢話大眾近年對健康要求高咗，周遭環境又因受污染而容易引起敏感，日本好多少女都興起用嬰兒護膚品護膚，相信香港呢方面需求都會增加。
另一方面，據知樂善堂近年為唔少少數族裔人士提供培訓機會，然而現時有「假難民」濫用酷刑聲請情況出現，當問及會否擔心幫錯人時，梁紹安話，好多該區的少數族裔都係土生土長香港人，但礙於語言及文化差異而難以融入社區，加上佢哋為數不少，判斷真、假難民並非佢哋工作所能做到，佢哋可以做嘅係令呢群人士在社區發揮正面效用，例如開班教煮地道菜式，等佢哋有健康嘅生活習慣同圈子，就唔會向壞嘅方向發展喇。
卓妮