政情：劉強自言未必撳得住侯強
我哋前日獨家直擊上水鄉事委員會主席侯志強（侯強）與自由黨榮譽主席田北俊喺金鐘密會，商討退黨事宜，令人揣測佢想打正鄉事旗號，出戰聽日就截止報名嘅立法會新界東補選。尋日我哋喺一個活動上見到鄉議局主席劉業強，佢形容侯強係一匹「勇馬」，「派唔派馬出去佢都會跑」，講到侯強最近又話出選、又話退黨，好似唔關鄉議局事咁。定係兩人扯緊貓尾，夾計擺姿態向建制派同港府施壓？
鄉議局未定支持邊個
包括自由黨在內嘅主要建制黨派，均已表明支持民建聯副主席周浩鼎參加新東補選，唯獨係鄉議局至今未明確表態。早前以事忙為由缺席周浩鼎誓師活動嘅劉業強表示，知道侯強對補選好有興趣，加上做唔成北區區議會正副主席，自然想喺另一方面發展，但參選始終係重大決定，所以仲勸緊對方。不過，佢又話自己都未必撳得住侯強，所以鄉議局到依家都未定到支持邊個。
至於侯強今次計劃退出自由黨同參加補選，係咪代表鄉議局已拍板籌組「新界黨」？劉業強推說無論組唔組黨，佢哋都支持自己人參選，令議會內有人幫新界人嘅傳統權益發聲喎。