政情：「過來人」高永文籲跑手小心
今日係一年一度嘅渣打馬拉松，可惜天公不作美，跑手極可能要喺雨中作賽。食物及衞生局局長高永文尋日以「過來人」身份，向跑手作出「溫馨提示」，叫佢哋安全至上、小心地滑，大家真係要聽佢勸告呀！
高永文上月參加一個慈善賽跑開步禮，因為要避開一個跌倒地上嘅小朋友而仆親，成邊面加嘴唇流晒血，連眼鏡都飛埋出嚟。送院後證實佢顴骨骨裂，額頭縫咗幾針，休息咗成半個月先可以復工。佢尋日出席一項活動時就語重心長咁呼籲，今日天氣又凍又有雨，跑手要注意保暖同小心地面濕滑，適當調整跑步速度，特別係慢性病患者，應該向醫生查詢適唔適宜參賽。