政情：心「雄」創業「徐」時失敗
創新及科技局剛成立，今年施政報告亦都喺創新科技方面重點落墨，淨係資助大學研究同埋成立創科創投基金方面，已經超過四十億元以上。其實搵投資者投資初創行業先至係最困難嘅事，連港科院院長徐立之都話，自己曾經幾次創業都唔成功，仲自嘲︰「教授做生意都唔係點得」。咦？創科局局長楊偉雄曾經係大學副校長，都算係個學者，佢同徐立之連樣貌及身形都好神似，唔知佢幫香港搞創科產業又撈唔撈得起呢？
徐立之尋日出席一個青年網台節目，同幾位喺創科業發展嘅後生仔交流意見。其中一位做應用程式嘅後生仔就話，公司成立一年後需要融資，但發現喺香港搵投資者特別辛苦，加上香港文化係怕失敗，一次失敗就會被「打入冷宮」，就算政府出手投資都要好小心，因為郁啲都會畀人鬧倒咁多錢落海，真係創業艱難。
「教授想完美 市場唔等你」
徐立之聽完亦自爆創業失敗嘅經歷。原來佢喺加拿大時，都試過想自己創業，寫過幾份計劃書，點知最終連「Angel（天使投資者）」都搵唔到。佢總結經驗話，教授做生意都係唔係點得，因為教授做嘢實係想做到完美先上市場，但市場唔會等你。佢仲話，做科技出身嘅人，就要搵啲做生意嘅人幫手。至於今次施政報告咁支持科技業，佢話係個好開始，不過希望政府審批制度可以完善啲，審批過程可以快啲。
黃岳永呻政府審批太長
講到審批慢，身兼創業導師同天使投資者嘅香港資訊科技商會主席黃岳永（Erwin）都有同感，尋日佢喺電台節目上呻話，「慢」係政府嘅最大問題。佢認為，政府難免要審慎行事，以致審核時間長，但唔少嶄新意念幾個月後就會落伍。所以一個初創意念若十個月、十二個月都未能獲得資助，就會「遠水不能救近火」，白白錯失最佳嘅發展業務時間。
Erwin好晦氣話，與其等政府用餘下十幾個月完成諮詢、討論同撥款，不如把握自己嘅資源做好件事喎。睇嚟徐立之及Erwin對政策點落實有啲擔心，唔知楊偉雄最後會唔會有錢唔識使呢？