立法會議員除咗出席周三大會，仲要參加唔同委員會會議，但好多都係有頭威冇尾陣，會期去到一半或尾段就會退出委員會。好似工聯會麥美娟（Alice）日前就退出咗資訊科技及廣播事務委員會（委員會），唔通佢覺得政府已經成功成立咗創新及科技局，創新科技政策可以留番畀政府去做？Alice就話，純粹係因為唔得閒開會，加上佢同委員會主席葛珮帆（EQ）好熟，有啲乜嘢都可以問番EQ喎。
Alice日前去信委員會，話今個會期開始以來公務繁重，為調節工作安排，幾經權衡後無奈決定退出委員會。
而佢退出之後，所屬嘅工聯會就冇議員喺呢個委員會喇。Alice就話，佢退出委員會係唔關政府已成立創科局事，只係因為唔得閒開晒咁多個委員會啫。
至於點解唔退出其他委員會，佢就話係因為同EQ熟，有乜嘢可以問番EQ，仲話可能再忙啲嘅話都會退埋其他委員會喎。睇嚟九月選舉臨近，相信議員都選擇留多啲時間做選舉工程喇。