政情:搞港大罷課 學聯老鬼博翻生

中文大學前校長李國章獲委任為港大新任校委會主席,有學生就喺網上號召罷課行動,仲喺星期一舉行咗第一次罷課大會,選出大罷課委員會成員。據知,學聯前常委梁麗幗及前學苑副總編王俊杰係今次罷課行動發起人,選舉「罷委」時兩人都成功當選,而學聯前秘書長周永康亦獲選為「罷委」,唔通一眾前學生領袖希望藉今次罷課「借屍還魂」?

當晚醞釀罷課大會約有一百五十位同學出席,其中包括曾經在facebook信誓旦旦表明唔會搞罷課嘅學生會會長馮敬恩。

會議過程非常神秘,學生不但阻止傳媒採訪,更加用膠袋遮掩窗戶,好似有好多不可告人的秘密。佢哋最後宣布有十五位同學包括梁麗幗、王俊杰、周永康及本土民主前線成員梁天琦獲選為罷課委員會成員,並會喺聽日舉行第二次罷課大會。

傳暫定1‧20 四日後絕食

據知,罷課日暫定在本月二十日開始,本月二十三日會有全民大會,並計劃二十四日開始展開絕食行動,但一切行動都有待第二次罷課大會中落實。其實過去大學生罷課都由學聯主辦,今次冇其他院校支持,港大就算搵到前學聯成員坐鎮,都未必咁易成功,再加上李國章登位已成定局,學生仲可以玩得出咩花樣呢?

第一手消息請下載on.cc東網iPhone/iPad/Android/Windows Phone Apps