政情：炸彈餘波 議員求安檢

吳亮星憂阻一帶一路

本身係立法會行政管理委員會（行管會）委員嘅金融界吳亮星話，香港係商業城市，繁榮與安定之間密不可分，擔心今次炸彈恐嚇會令外間覺得香港不再安全，影響金融中心地位之餘，仲會令到「一帶一路」國家及地區卻步。問到會否憂慮安全受威脅，佢話議員都係普通市民，當然唔希望再發生相關事情，敦促犯事者「絕對要收手」。

同樣係行管會委員之一嘅陳家洛就透露，立法會接獲炸彈恐嚇時，佢正喺大樓內接見市民，認為秘書處收到消息後應以短訊通報大樓使用者，甚至就疏散安排要有更完備嘅考慮。佢又話，會喺下星期二會議中主動了解秘書處嘅保安安排，要求交代面對類似情況嘅應對措施；而會議亦會討論去年未完嘅事項，包括參考世界各地國會大樓嘅保安系統。

對於另一委員陳健波建議進入大樓者要全部做安檢，陳家洛就譏笑對方「覺得自己處於危險嘅星球」，認為相關建議應諮詢公眾。不過，陳健波嘅安檢要求並非不合理，因為過去曾有泛民主派議員及助理成功攜帶發電機燃油進入立法會大樓，實在有潛在危險。

陳維安強調繼續調查

工聯會黃國健話，雖然今次好大可能係惡作劇，犯事者亦未至於激進到要用鮮血及生命達到目的，但預計類似情況會變本加厲，有樣學樣。佢話呢類暴戾行為只會帶來更多負能量，但認為立法會毋須急於提升保安系統，因為會破壞立法會致力建立嘅開放形象。立法會秘書長陳維安表示，雖然警方到場仔細搜查後並無任何發現，但強調會繼續調查有關電郵。