中環出更：密會田少 侯強傾退黨
外界一直盛傳上水鄉事委員會主席侯志強（侯強）有意退出自由黨，以便日後聯合新界鄉議局其他鄉紳合組成「新界黨」，但退黨一事講咗半年都係只聞樓梯響。不過，卓妮尋日就直擊侯強密會自由黨榮譽主席田北俊（田少）傾退黨，席間仲出現疑似退黨信文件。莫非「新界黨」組黨已經獲有關方面「祝福」，所以要侯強急急退黨？
尋日上晝十一點三十五分左右，卓妮目擊田少同侯強一齊行入金鐘中信大廈一間咖啡店，先喺門口選購食品及咖啡，然後入內會合提早去搵位嘅前葵青區議員黎少棠。不過，佢哋似乎嫌原先張枱嘅位置太當眼，選擇轉到最角落較為隱蔽嘅一張枱坐低，然後就開始「密密斟」，期間黎少棠喺袋中拎出幾份文件，田少同侯強就認真傳閱。會面約一小時後，田少急步先行離開，而侯強同黎少棠隔一陣先行出咖啡店。
鄉紳料另組「新界黨」
卓妮追問侯強同田少共商咩大計，侯強透露係談論退黨事宜，佢已向田少表明，一旦鄉議局成功組成「新界黨」，佢就會退出自由黨。至於田少有冇挽留？侯強話田少表示尊重，但重申自己目前仍然係黨員，與田少亦保持好朋友關係。佢又透露，尋日下晝五點亦約咗鄉議局主席劉業強討論組黨一事，並會喺下周二（十九日）鄉議局大會上討論。
有政壇中人分析，侯強喺新界東地區影響力不容忽視，自由黨可能要靠佢嘅票源先可以喺九月立法會選舉力保唯一嘅新界東直選議席，所以識得審時度勢嘅侯強，於「新界黨」組成之前，實行一石二鳥，提早向田少講定退黨嘅意願，睇吓田少會唔會挽留及對自己有多大誠意，同時睇埋鄉議局對佢係咪同樣重視。究竟故事會點發展，相信最快下周二自有分曉。
卓妮