政情：高佬賢鍾意劏河豚醃鹹魚
雞泡魚（河豚）多數有劇毒，喺日本食肆劏河豚出售必須領有牌照，但漁農界立法會議員何俊賢（高佬賢）就冇有怕，自爆鍾意劏雞泡魚醃製做鹹魚。早前高佬賢出席漁農美食嘉年華時，行過海味檔時話好鍾意食鹹魚，仲話雞泡魚醃製而成嘅鹹魚非常好食，用雞泡魚炆蘿蔔嘅味道仲好似牛扒配紅酒咁夾。不過，佢警告醃製雞泡魚前要劏乾淨個鰓，確保無毒。
高佬賢話，食鹹魚係漁民嘅傳統，身邊唔少年輕朋友都鍾意食，佢知道有人唔太欣賞鹹魚，可能同唔識揀有關。佢話曬鹹魚時點樣擺、放幾多石頭壓住嚟曬，鹹魚味道都會唔同，所以長洲同大澳嘅鹹魚味道有分別。不過，食得太多醃製食品始終唔健康，佢認同所有食物都係「少食多滋味，多吃壞肚皮」，加上為咗響應少鹽少糖嘅健康飲食習慣，佢建議醃鹹魚時可以放少啲鹽。