政情：屋企當舞台 姚珏奏出膽量
著名小提琴家姚珏早前首次一嘗街頭快閃演出，佢話膽係練番來，記得童年時表演會膽怯，屋企每逢周日就會有人來作客，父親都會要求佢表演。佢話，最初好唔願意，邊喊邊拉奏，後來卻逐漸享受，到首次真正踏上舞台已毫不畏懼，認定「舞台是我家」。
樂團獲資助辦免費課程
早前姚珏為香港弦樂團嘅《賽馬會音樂能量計劃》揭幕並演出，該計劃獲馬會資助，為二百四十位低收入家庭學生提供三年免費小提琴課程。身兼樂團創辦人嘅姚珏話，會同多間小學合作，挑選有天分而無經濟能力嘅學生，畀佢哋可以有機會發揮天分，預計本月底至下月初可正式開始課程，由樂團內成員負責教授，每位學生仲會獲贈一支小提琴。
姚珏話，甚少機構可同時提供免費學習樂器及演出機會，佢認為舞台先係學生真正成長嘅地方，因此計劃除咗培育一班有天分嘅學生外，更會於三年間舉辦多場社區音樂會，畀學生夥拍樂團成員以快閃形式現身多區演奏，由佢哋二十多位樂團成員感染學生，再由學生感染社區受眾，將音樂能量傳開去。