政情：不滿施政 工記作反

該黨議員答問會唔齊人

前日工聯會喺回應施政報告嘅記者會上，一眾議員齊齊企足兩分幾鐘，由王國興做代表發表幾句意見，表示對施政報告感到「非常失望，非常不滿」。聲明一讀完，王國興說：「係咁多喇，唔該晒！」之後就拉隊離開，冇好似其他建制派議員坐定定回應記者提問。記者其後追問佢會唔會反對施政報告致謝動議，佢只係答：「我哋會研究。」

直到尋日特首答問大會，只有陳婉嫻、王國興、麥美娟及鄧家彪在場，黃國健及郭偉強就缺席。據稱郭偉強因為要去北京交流而未能現身，但黃國健喺香港都無出席。黃國健解釋，因為有其他事撞時間而缺席，但佢否認係杯葛答問大會，因大家都係按自己嘅時間表而決定係咪出席。

口講無敵 有縮沙前科

王國興就喺答問大會後仲發炮，指當年支持特首上任，係因為特首承諾會將勞工權益放落政綱。佢揚言會全力追數，最低限度希望可以縮減強積金對沖比例。被問到會唔會喺施政報告致謝動議時投反對票，佢話要再研究，但唔排除任何可能性。

不過，工聯會表面看似「係威係勢」，但最後會唔會「縮沙」實在好難講，因為「縮沙」已經並非首次發生，唔知今次會唔會又係虎頭蛇尾，最後耳仔軟又支持施政報告致謝動議呢？有工聯會中人憤言，施政報告當勞工界無到，若今次唔反對致謝動議，九月選舉必定無運行，就算最後唔敢投反對票，都要投棄權票以示不滿。