中環出更：創科局遲開 莫乃光賴建制
資訊科技界立法會議員莫乃光（Charles）喺創新及科技局議案審議期間腹背受敵，一方面要跟泛民大隊反對，另一方面業界對成立新局嘅殷切期望，畀咗佢好大壓力。去年十一月創科局成功開局，Charles終於可以鬆一口氣，佢尋日喺特首答問大會中更加轉守為攻，將件事講成係建制派反對成立創科局，企圖將責任推得一乾二淨，結果被噓聲四起。
講歪論被噓
Charles尋日一開始就大放厥詞，批評施政報告對資訊科技界嘅支援係「冇料到」，更加取笑特首唔識用社交平台LinkedIn同Twitter。特首亦不甘示弱，話點解創科局遲咗三年先可以成局，大家都心中有數，暗批泛民拉布。Charles立即反擊，話一二年過唔到，其實係因為建制派議員唔幫政府，唔好賴泛民。言論一出，就引來在座建制派嘩然，並向莫乃光發出噓聲。
其實Charles咁講，又真係不盡不實，當時建制派議員反對，主要原因唔係反對成立創科局，而係因為泛民揚言拉布，為免議程積壓而出此下策。雖說有建制派反對議案，但主要都係對設立文化局等嘅內容有意見，所以話建制派反對成立創科局，又確係同事實不符。
卓妮