中環出更：女童軍注新血 玩轉百周年
今年係香港女童軍運動一百周年，為慶祝咁重要嘅日子，香港女童軍總會（總會）籌備咗一系列趣味活動，包括展示不同年代嘅女童軍制服，又請知名插畫家設計有趣嘅女童軍造型等，但要數最大型嘅慶祝活動，就係年底喺深井舉行嘅國際大露營，屆時香港及世界各地女童軍將齊齊參與，總之由年頭玩到年尾。
陳寧寧羅詠詩加盟
為咗百周年慶典及未來發展，總會今年特別搵咗「新血」加入幫手，包括擔任名譽副會長嘅百仁基金副主席陳寧寧及羅詠詩（Anthea）。早前兩人齊齊出席總會周年慶典啟動禮，於女童軍香港總監李周美枝、前總監李張慧美及孫鍾小芬等資深前輩帶領下，推動一系列活動及大計。
Anthea話，佢讀書時一直係文靜派，甚少做運動或參加制服團體，反而佢老公做過童軍，所以成日畀老公笑佢點解細個性格咁悶，依家佢就要參加多啲畀老公睇，今次係孫鍾小芬介紹佢入會嘅。Anthea仲話，多咗參與社會服務後，感受到唔同團隊嘅凝聚力，非常享受並樂在其中。
講起套制服，首次加入制服團體嘅陳寧寧大讚套制服又靚又整齊，但卓妮見到名譽副會長郭詩慧套制服同其他女士唔同，原來佢哋有兩款制服，一款係外套及短裙套裝，另一款係質料較薄的連身裙，方便配合唔同天氣穿着。
咪以為女童軍總會只得女士，其實亦有唔少男士支持女童軍，好似當日都有到場嘅名譽副會長彭穎生、陳明耀及王嘉恩等人。彭穎生同陳明耀亦分別喺唔同地方分會服務好多年，相當難得。
卓妮