鬍鬚曾最近發表網誌《如水一樣》，大談習武往事、武術理念，特別指出李小龍的「截拳道」，對他的生活、工作及待人接物都有相當啟發性云云。
鬍鬚曾儼然武術名家，西洋劍擊、洪拳、詠春無一不醒；其網誌一時又舉「牛頓第三定律」，一時又引《道德經》嘅「上善若水」，講到頭頭是道，說甚麼如做人處事，能夠如水一樣，把原來要硬碰的力量化解，甚至變成對自己有利的力量，就可無往而不利。睇嚟鬍鬚曾更善於「吹水」！
鬍鬚曾寫嘢似乎叻過講嘢，事關每次佢發表關於香港經濟前景嘅偉論，來來去去都係嗰幾句：外圍經濟環境轉差、亞洲出口受挫、金融市場大幅波動、買樓要量力而為……總之，阿媽係女人，阿爸可能生鬚，卑之無甚高論，老朽一樣可以隨口噏當秘笈：「上善派水」才是無敵！每人派二萬，老朽必歌之：桃花潭水深千尺，不及財爺送我錢！
鬍鬚曾若然理財亦「如水一樣」，咁就唔使畀人鬧佢「守財奴」，做咗咁多年財爺，最叻一招小恩小惠嘅「派糖」，對於社會民生嘅多艱，佢一味守住個水浸嘅金庫，最叻假設如增加福利撥款，若干年後政府就會出現「結構性財赤」……政府窮得只剩下錢，都焦慮成咁，香港百多萬的窮人，有曾俊華做財爺的一日，想變身都難矣！想有好日子過都難矣！執紙皮嘅阿婆繼續執紙皮，住劏房嘅繼續住劏房，上唔到樓嘅繼續望穿秋水。
鬍鬚曾呢個「中產」，除了有時上茶樓食熱辣辣嘅蝦餃，有時歎吓咖啡，睇吓法國電影，有時耍吓洪拳，有時「撫長劍、一揚眉」，生活優游，多姿「如水一樣」，真係羨慕死捱到隻狗嘅普羅中產。至於佢新一份嘅財政預算案，想佢學澳門咁豪派錢，就真係凍過水！