政情：阿基表明唔撐哪吒戰新東
自稱係「第三力量」嘅西貢區議員方國珊（哪吒），尋日正式報名參加立法會新界東補選。雖然哪吒多年來都強調自己既非建制、亦非泛民，係真正獨立無黨派區議員，但屬於泛民陣營嘅民協立法會議員馮檢基（阿基）就被讀者發現，喺新界東地區同哪吒「孖公仔」掛橫額，懷疑阿基或民協暗撐哪吒，違反泛民經協調後，一致支持公民黨楊岳橋出戰補選嘅承諾喎。
稱會提醒拆「孖公仔」橫額
我地問過阿基，佢話係一場誤會啫，佢承認同哪吒一向有就某啲民生議題合作，但啲橫額多個月前已經開始掛，唔代表佢或者民協支持哪吒參選，強調民協仍然係全力支持楊岳橋，冇轉軚或陽奉陰違。阿基仲話，根據選舉規例，哪吒或有關當局有責任喺哪吒報名參選後移除有關橫額，如果哪吒遲遲都唔做，佢會主動提醒哪吒，似乎係想同哪吒劃清界線。
雖然哪吒得唔到阿基嘅祝福，但佢尋日報名參選嗰陣，就咁啱撞到自稱獨立民主派嘅沙田區議員陳國強，陳國強仲即時簽字提名哪吒，為佢「加持」添！