中環出更：范國威三擾發言 葉劉發火
泛民主派為求成功「拉布」，真係無時無刻要求點算開會法定人數，點到新民黨主席葉劉淑儀（葉劉）都忍唔住發火，大鬧新民主同盟范國威（Gary）「劖亂歌柄」！話說葉劉發言時，突然被Gary打斷，話要點人數，葉劉冇得暢所欲言，忍唔住批評Gary應該等佢發言後，才要求點算人數，又話Gary自己發言時，亦唔會想其他人「劖亂歌柄」，希望佢為年輕人樹立好榜樣。
點知Gary仲唔學乖，喺葉劉發言四分幾鐘後，Gary再要求點人數，葉劉忍唔住嬲嬲哋，大鬧Gary冇禮貌，滿口人權自由，但係就唔尊重其他人發言權利，係「教壞後生」。不過，呢場戰役仲未玩完，葉劉再發言五分鐘後，Gary又打斷話，對葉劉冇禮貌嘅係保皇黨，要請保皇黨返嚟聽葉劉發言，跟住第三次要求點人數，有建制派議員即時批評Gary「屈得就屈」。
最終，葉劉十五分鐘嘅發言，就足足被Gary打斷咗三次，斷吓斷吓幾分鐘，就咁聽一段，真係好難明白完整意思，的確係為拉布而「劖亂歌柄」，難怪主席曾鈺成都出聲話，根據議事規則，議員不應打斷其他議員發言。
卓妮