中環出更：經濟樓股下調 應對有方法
經濟市道麻麻，加上中港股市大跌，可能對本港樓市造成一定壓力。旗下有唔少收租物業嘅協成行董事總經理方文雄（David）尋日出席活動時，預期未來一年樓市會有下調機會，不過市民仍有購買力，只係保持觀望態度啫！佢又大派定心丸，認為市道差應屬於周期性，遲吓又會好番啲o架喇！
位於黃竹坑嘅「香港青年協會賽馬會社會創新中心」尋日舉行開幕典禮，呢個地方係協成行活化的工廈，當中有部分樓層係以相當於市值租金三分一水平，出租予慈善機構或社企，所以David梗要出席喇！講起內地遊客減少，有經營精品酒店嘅David就話唔考慮將酒店改變用途，皆因市道終有好轉嘅一日。
徐立之「保守」唔敢創業
創新及科技局局長楊偉雄、港科院創院院長徐立之亦有到場。徐立之笑容滿面，原來佢啱啱去完多倫多探孫仔，難怪心情大靚。現場有年輕人主動向徐立之介紹自己研發嘅產品，徐立之自言好驚嘆，又話從未想過創業，事關佢性格保守，鍾意十拿九穩，做生意要有冒險精神，唔多啱佢喎！
「鑽的」創辦人梁淑儀（Doris）、做生物科技嘅水中銀國際董事總經理杜偉樑（Jimmy）就同大家分享創業經驗。Doris話，創業第一年好似燒銀紙咁，佢以為公司好快就要倒閉，幸好後來改變策略，情況先至有改善。Jimmy就鼓勵年輕人，創業除咗要有人脈及堅持外，仲要夠「厚面皮」，唔好怕瘀喎！
卓妮