屋漏偏逢連夜雨，原本已陷入寒冬嘅旅遊業，近日因為規管問題而引起業界內訌，簡直雪上加霜。最奇怪嘅係，業界爭議不休，家嘈屋閉，而港府一味袖手旁觀，好似唔關佢哋事咁，問你服未。
係咁嘅，今次業界內訌嘅導火線係旅議會元旦起推出多項規管措施，包括收緊登記店舖嘅購物指引、為內地旅客提供一百八十日退款保障，以及旅遊車必須展示「車頭紙」、導遊必須佩戴導遊證等等。旅議會聲稱呢啲措施旨在令業界「有規有矩」，減少強迫購物等亂象喎。點知部分業界人士認為規管過嚴，發起不合作運動，除咗拒絕佩戴導遊證、拒絕張貼「車頭紙」，並計劃分別循司法覆核、種族歧視及違反競爭條例，挑戰旅議會嘅監管權力添。
可以見到，業界人士連日來嘅抗議行動搞到滿城風雨，而且不斷升級，甚至派人到旅議會登記嘅店舖外派傳單，指相關店舖可能誤導旅客。而另一方面，旅議會就指呢啲行動滋擾店舖，並指相關傳單印有旅議會字樣，結果要報警處理，七國咁亂。
正所謂，清官難審家庭事。業界內訌究竟誰是誰非，外人一時好難判斷，唯一可以肯定嘅係，如果繼續爭拗落去，只會添煩添亂，唔止旅遊業雪上加霜，成個社會都冇運行。呢，向旅議會登記嘅店舖本來有七十二間，其中十幾間唔肯簽署承諾書，照計唔可以再接待內地團，結果一樣有導遊帶團上門，旅議會話就話收到唔少投訴，可惜得個嘈字，根本束手無策。
講嚟講去，旅遊業之所以搞成咁，皆因港府卸責。監管旅遊業本來係港產官僚嘅責任，佢哋一味將責任推畀旅議會，然後關人個關。其實大家都知道，旅議會只不過係行業自律機構，自己人管自己人，唔止難以服人，而且隨時受到挑戰。今次有人質疑旅議會冇權查導遊證，唔係冇理由（口架），查證件應該係警方嘅責任，旅議會唔係執法機構，名不正言不順，點可能唔受質疑吖。
最離譜嘅係，業界內訌搞到滿城風雨，港府居然置身事外，冇諗辦法化解紛爭不特止，相關官僚甚至影都唔見，連做騷都懶，你話係咪豈有此理？所以話，港產官僚冇嘢叻，最叻就係卸膊。好多年前，當局就話要成立旅遊業監管局，取代旅議會嘅監管功能，點知一直只聞樓梯響，一時話法例內容繁複，一時又話草擬時間較預計長，總之藉口多多，拖得就拖。正如有人話齋，等到旅監局成立嘅時候，旅遊業呢條經濟支柱可能已經冧咗咯。
正所謂，綿綿不絕，必有亂結。本港面臨內憂外患，亂象多多，唔係冇原因（口架），港產官僚一係庸碌無能，一係敷衍塞責，香港唔亂至奇喇！