香港樓市雖已轉勢，但整體樓價仍然嚴重脫離一般市民嘅負擔能力。運輸及房屋局局長張炳良尋日出席立法會房屋事務委員會時，重申政府現階段唔會為樓市減辣。不過，政府同時又將未來十年嘅長遠房屋供應目標，由之前嘅四十八萬個單位修訂為四十六萬個，公私營房屋各減約一萬個單位，令人質疑政府一邊就唔減辣，另一邊就減少房屋供應托市。張炳良否認政府有意托市，強調新指標係基於上年度嘅更新數據估算，又指供應目標減少，正正顯示政府要更加努力覓地建屋，真係乜都畀佢講晒！
