政情：謝偉俊「重裝」上陣 無懼爆炸
三十五公斤嘅裝備有幾重？立法會議員謝偉俊（阿Paul）試完之後話：「真係好重！」十八名立法會保安事務委員會成員尋日去警察總部參觀，警方安排議員了解爆炸品處理課（EOD）嘅工作。EOD即場試爆咗三克、即係三張廿蚊紙咁重嘅炸藥，但爆起上嚟都引發「嘭」一聲巨響，嚇到班議員嘩嘩聲。
35公斤裝備 「真係好重」
EOD之後再示範用拆彈機械人「威霸龍」引爆可疑物品，身穿全套防爆裝備嘅人員，之後再上前確認可疑物是否已沒危險性。「遠觀」過後，班議員終有機會同林林總總嘅拆彈裝備近距離接觸，期間EOD人員提到成套防爆裝備有成卅五公斤重，並邀請議員試穿，最後阿Paul「接受挑戰」，喺兩名警員協助之下，將厚重嘅裝備套上，除低後直言「真係好重」。