政情：白鴿網想搶議席
去年區議會換屆選舉結果，某程度顯示網絡戰成為選戰不可或缺嘅一環，其中被視為泛民龍頭嘅民主黨（白鴿黨），繼早年成立創意媒體部主力於Facebook發貼闡釋黨內立場或回應外界質疑，有指連白鴿黨嘅立法會甄選名單亦內含網絡因素玄機，因為同網民有較多互動嘅中西區區議員許智峯及元朗區議員鄺俊宇（Roy）都有報名，相反黨內多名資深議員及主流派代表均自行求去，莫非冥冥之中有注定，白鴿黨或要揀同網民有共同語言嘅人選出戰立法會？
「區羅柴」棄選 局勢明朗化
白鴿黨自從二○一○年支持政改「一人兩票」方案，自此頻頻畀網民翻舊帳攻擊，好在一批「乳鴿」都敢於網上世界同持不同意見人士開火，開拓網上世界嘅任務亦於佢哋身上，因此白鴿黨嘅甄選名單曝光後，外界對於資深議員如劉慧卿、何俊仁及單仲偕退下火線，均認為屬意料中事，相反被外界簡稱為「區羅柴」嘅三名南區區議員，即區諾軒、羅健熙及柴文瀚竟然異口同聲冇報名參與甄選程序，變相放棄今年九月進入立法會嘅入場券。
基於「區羅柴」三人嘅最新動向，亦間接令白鴿黨五大直選及俗稱「超級區議會」議席嘅布陣明朗化，首先九龍東、九龍西直選料分別由胡志偉及黃碧雲冧莊出選，而香港島直選在缺少「區羅柴」直接競爭嘅情況下，近年抗爭形象鮮明嘅許智峯，料可以擊敗多次於區選落敗嘅黨友莊榮輝出線。
鄺俊宇或轉戰超級議席
至於四年前一席都冇嘅新界西直選，白鴿黨今次有黨副主席尹兆堅、早前落敗區選嘅陳樹英，以及近年以寫愛情小說殺出一條血路嘅Roy三人報名爭出線，其中以尹兆堅出選機會較大，而值得留意嘅係，Roy深受唔少文青、少女以至網民支持，或可轉戰超級議席同涂謹申聯手開拓新票源。
新界東直選嘅形勢，則因劉慧卿主動宣布退下火線或掀起一場亂局，新任北區區議員林卓廷有意接棒於新東參選係政圈公開秘密，惟據知佢於黨內人緣一般，特別係前綫系更疑似派出大埔區議員區鎮樺力阻林卓廷自動出線；至於新入黨嘅變性人梁詠恩，似乎參與甄選就係宣傳性小眾議題為主，預料出線機會較微。