中環出更：鄉事民記反面 張學明照當選
鄉議局與民建聯嘅內鬥日趨白熱化，先有鄉議局主席劉業強臨時甩底，缺席民建聯副主席周浩鼎尋日宣布參加新東補選嘅記者會，之後又有人流出一份新界廿七鄉「民情報告」嘅初稿，暗批民記選舉時就攞鄉事票，當選後卻冇為新界人發聲，甚至喺關鍵時刻「背信棄義」，建議鄉議局應積極考慮派人參選。
稱顯示大埔區會團結
不過，尋日舉行的新一屆大埔區議會正副主席選舉，兩名民記成員張學明同黃碧嬌卻雙雙喺無對手下當選連任，之前傳過會挑戰佢哋嘅鄉事派成員，最後又係甩咗底！張學明當選後話多得大家承讓，結果亦顯示大埔區會好團結。身兼鄉議局副主席嘅佢又話，民記同鄉事派並無不和，強調建制派一直有喺立法會為原居民爭取權益喎。
離島區議會亦於尋日選出新一屆正副主席，鄉事派成員周玉堂、以及鄉議局前主席劉皇發嘅女婿余漢坤，同樣喺無競爭下自動當選。今日將有達十一個區議會選舉正副主席，唔知係咪又係咁和諧呢？
卓妮