中環出更：智囊團獻策 「瑩」來工展小姐
尋日係工展會煞科兼「攤位設計大獎」同「工展小姐選舉」結果出爐嘅大日子，其中後者由威馬企業嘅代表黎雪瑩大熱勝出，亞軍同季軍分別為來自和興隆潮州花生糖嘅張翠茵同來自昇鋒國際嘅馮凱懿。黎雪瑩喺賽後會見記者時感動到不停落淚，情景仲感性過好多由電視台舉辦嘅選美活動。
點解話黎雪瑩係大熱門呢？除咗因為一個靚字，原來威馬企業過往亦出過唔少工展小姐，唔通佢哋公司特別盛產靚女員工？卓妮見到該公司嘅董事總經理蔡嘉軒，當然要問吓佢究竟有咩秘訣。
蔡嘉軒透露，佢哋公司原來十幾年前已經開始派出員工參加工展小姐選舉，同事亦都相當重視呢個活動。好似今年咁，佢哋就特登組成咗一個智囊團，為黎雪瑩出謀獻策同打氣，包括一齊度橋商量表演咩項目。尋日一選完，佢哋就立即一齊食飯慶祝，之後會再搞番場慶功晚宴！
同場嘅香港中華廠商聯合會青委名譽副主席羅程剛表示，自己公司主打海外客，所以甚少參展同參賽，但睇完今日咁開心兼感人嘅場面，將來佢都會諗吓，因為除咗可以提升公司形象外，仲會令員工更有歸屬感及團結，同事間話題都會多咗。
符策雄18年後派女出戰
廠商會副會長戴澤良與太太羅台秦尋日亦有現身撐場，戴澤良憶述，佢哋公司喺五十年前都曾經有同事參選過工展小姐，估計該位員工現已年過六十，成為公司內嘅一段小故事。
廠商會會董符策雄就表示，幾年前有同事參選過，雖然攞唔到冠軍，但係就贏過才藝小姐獎，佢笑言十八年後會叫個女去參選，原來佢囡囡只得四個月大。
卓妮