食色性也，香港人出名嘴刁，連烹飪節目都叫《今晚食乜餸》。可惜吖，食安問題無日無之，黑心食品氾濫成災，今晚食乜餸真係要諗清諗楚，否則，一個唔好彩，隨時病從口入都似！
唔係誇張o架，繼化學豉油、化學蠔油、重金屬海鮮及瑤柱後，本報再揭發黑心商人喺茶葉做手腳，而且有唔少招數添。有人以次充好，將已經變黃嘅舊龍井，用孔雀石綠粉「上妝」，增加色澤；有人以鐵茶壺沖茶增加色澤；有人甚至喺二手茶葉上噴灑銅銹水扮高檔貨……五花八門，無奇不有。咁都未算吖，內地唔少茶田鄰近城市，受工廠釋出嘅廢氣影響，茶葉被重金屬污染，而且難以分辨，根本防不勝防。
咪以為係小事吖，正如專家指出，長期飲用含有重金屬以及殘餘農藥嘅茶葉，輕則慢性中毒，影響肝腎，重則損害中樞神經甚至致癌。特別係孔雀石綠茶葉，化學物泡茶時融入水中，毒性仲強過孔雀石綠魚，問你怕未。
話時話，黑心茶葉賣通街，早就唔係新聞咯。消委會幾年前抽查市面四十多款內地茶葉，結果發現所有樣本都含有重金屬鉛以及少量殘餘農藥，部分更含有致癌物滴滴涕以及其他禁用農藥添。環保組織化驗十八個茶葉樣本，亦發現全部含有殘餘農藥，最誇張嘅樣本含有十七種農藥咁多。你話嘞，長期飲呢啲茶葉會有乜嘢後果吖？
最大鑊嘅係，黑心茶葉氾濫成災，本港食安官僚竟懵然不知。好似早前台灣爆出毒茶風暴咁吖，本港食安中心以為事不關己，高高掛起，直至傳媒揭發問題茶葉在港有售，當局至急急補鑊，反應足足慢咗九拍。有立法會議員就講得啱嘞，當局只對少數茶葉進行檢測，之後又唔公布結果，完全冇透明度，加上法例過時，台灣同外地早就詳細列出茶葉中殘餘除害劑嘅清單同標準，唯獨香港好似無王管，唔出事至奇。
所以話，官僚靠得住，豬乸會上樹。大家有眼見，黑心食品長驅直入，大陸同台灣一出事，香港例牌無法幸免，如果唔係食安官僚後知後覺，又點會搞成咁吖。係人都知，本港食品主要依賴入口，內地固然係無食不毒，無物不假，台灣亦係問題多多，唔怪得有人話，兩岸仲未統一，黑心食品早就「一國一制」，喺咁嘅情況下，食安把關幾時都要寧緊勿鬆，否則，隨時死得人多o架。
民以食為天，食以安為先，市民連飲啖茶都擔驚受怕，講起都可悲。好多人新年願望係「出入平安」，其實計功夫茶話齋，今時今日只要「飲食平安」，已經還得神落。