政情：八網難逃：嫻姐捉「星」去行山

立法會議員陳婉嫻（嫻姐）不嬲都鍾意行山，尋日佢有新「行山友」，就係環境局局長黃錦星（星星）喇 ！經常去東涌行山嘅嫻姐話，東涌有好多綠化帶，政府要發展東涌都應該符合低碳精神，不過過往本港規劃新市鎮時，環境局都好似冇角色咁，覺得今次東涌發展，環境局應該要一開始就「入場」，所以就同香港中文大學建築系副教授鄭炳鴻捉埋星星一路行山，一路傾東涌規劃問題。