中環出更：象哥唔戒煙老婆嬲足幾十年
工聯會會長林淑儀同立法會議員黃定光（象哥）結咗婚幾十年，一向相當恩愛，但兩夫婦早前出席宴會時，林淑儀就大爆有件事嬲咗象哥幾十年，象哥咩事咁衰呢？原來係唔肯戒煙。林淑儀有少少激動話：「好嬲佢o架，講極都唔戒！」
既然林淑儀咁嬲，咁會唔會幾日都唔睬象哥呀？佢就笑住望象哥，話冇喎！象哥就急急大叫：「你唔好挑起啲事呀！」仲辯解話，立法會成日開會，加上「拉布」，已經冇乜機會食煙(口架)啦！睇嚟兩人都係耍吓花槍啫。
為愛妻行多幾步
其實象哥都知太太關心自己身體健康，佢話自己有「三高」，太太就經常煲啲降呢樣、降嗰樣嘅湯水畀佢飲，佢飲完都記住太太嘅苦心，唔敢亂食最愛嘅肥膩嘢。宴會當日附近難泊車，象哥擔心太太着高跟鞋行路辛苦，於是先放低太太，自己泊完車再行過嚟，認真細心！象哥揹起太太唔得咩？象哥話：「我邊揹得起佢吖！佢就揹起我幾十年。」把口真係o浪過油！
卓妮