中環出更：元旦入場觀賽 人強馬壯
元旦沙田馬場非常熱鬧，唔少名人都有入場迎新年。卓妮見到鄉議局主席劉業強（Kenneth）同太太劉葉愛愛（Judy）拍拖入場，Judy睇嚟心情唔錯，話除夕夜同仔女一齊食韓燒倒數。雖然Judy好好傾，但係Kenneth一臉心事重重咁樣，後來仲急急拉走Judy，唔知係咪怕卓妮問起爸爸劉皇發近況呢？
Judy話，除夕夜Kenneth要做六合彩監票嘉賓，所以佢哋開完獎先至趕返屋企送舊迎新。Judy話，Kenneth做咗主席後，少咗時間陪佢，不過佢都明白嘅，唔會怪責。至於點樣爭取多啲時間見面呢？佢就叫我哋問Kenneth喎！
王庭聰盼和氣冇爭拗
當日入場嘅仲有馬會前主席陳祖澤、南旋集團主席王庭聰夫婦及黃大仙區議員丁志威等人。丁志威一向係馬場常客，當日都睇得好肉緊，仲不時舉起手機拍攝馬匹衝線一刻，相當投入。王庭聰講起新年願望時話，希望新一年全港市民身體健康、一團和氣，如果社會有爭拗就會樣樣都唔好，最好就冇爭拗，有咩事大家都可以一齊坐低傾喇！
冠忠巴士集團主席黃良柏都有入場，佢名下馬匹仲跑第一，帶挈佢拉頭馬贏獎金，新一年真係有個好開始。不過佢就有啲晦氣話，咁得閒嚟跑馬，就知生意唔慌好啦，生意唔好所以要靠贏馬喎，講完仲大唉一聲，好似真係好苦咁。佢仲話，依家訪港旅客下跌好多，佢都好擔心，好彩自己嘅生意冇靠呢啲咋！
卓妮