紛紛擾擾嘅二○一五年過去，陰霾密布嘅二○一六年來臨，大家有乜新年願望呢？唔使講，梗係希望新一年好似除夕煙花咁，繽紛璀璨，笑口常開喇。不過咁，願望終歸係願望，未來一年香港挑戰重重，大家最緊要自求多福吖。
值得欣慰嘅係，世局變幻難測，而香港人嘅愛心始終如一，咁多年來風雨不變，為弱勢社群帶來曙光同希望。最佳嘅例子係，東方日報慈善基金自八五年成立以來，一直獲得廣大善長支持，淨係舊年已經接獲逾一千三百五十萬元捐款，超過十一萬人次受惠，呢啲咪就係人間有愛囉。
人生不如意事十常八九，貧病交煎往往係基層市民最難克服嘅關口。單係舊年，基金共接獲四十九宗病人求助治療費用個案，部分緊急個案更加獲「醫療專戶」先行撥款，全年涉及逾二百二十六萬元，為急重病人送上及時雨。尹潤雄係其中一位受助者，五十九歲嘅佢確診患上第四期肺癌，妻子同時患上乳癌，為咗醫治頑疾，耗盡積蓄，雖然知道轉用自費藥物係唯一生存機會，可惜無錢買藥。正當絕望之際，基金為雄叔籌得逾二十八萬元醫藥費，之後又透過「醫療專戶」緊急撥款支援，加上善長持續捐助，病人至可以繼續接受治療，病情漸趨好轉。佢好感慨咁話：「真係好多謝東方同善長一直咁幫我，我先至可以堅持落去對抗癌魔！」
除咗為清貧病人解決斷藥危機，基金亦向有經濟困難嘅家庭伸出援手。舊年一名地盤雜工喺升降機底工作期間不幸被重鉈壓中喪命，遺下妻子及半工讀嘅兒子，一家同時痛失至親及主要經濟支柱，徬徨無助。基金得悉情況後，即時撥款二萬元協助辦理身後事，並將善長捐助嘅逾十萬元善款悉數轉交，以解母子燃眉之急。命運無情，人間有愛，香港人以一點一滴嘅善款同愛心，譜寫出獅子山下同舟共濟嘅不朽名句。
所以話，東方日報慈善基金唔止係貧病老弱嘅及時雨，更加係紛亂世道下展現人性光輝嘅一股清流，三十多年來助人無數。唔係賣花讚花香，喺善長仁翁慷慨解囊之下，基金至今合共撥出超過五億元善款，近二百萬人次受惠，為社會發放巨大正能量。尤其係今時今日嘅香港，社會浮躁，激進勢力抬頭，更加需要愛心化解暴戾。
一句講晒，香港更美，全因有你。東方日報慈善基金必定會繼續本着扶危濟急嘅宗旨，服務社會，回饋社會，希望廣大讀者繼續鼎力支持，共襄善舉。正所謂，為善最樂，福有攸歸，呢個就係我哋最大嘅新年願望！