中環出更：陳雲生卸任 難忘屯門色魔案
在屯門友愛北選區擔任區議員逾廿載嘅陳雲生，今屆以百多票之差輸咗畀工黨譚駿賢。新一屆區議會展開之際，陳雲生就忙於執拾用咗廿幾年嘅辦事處，佢話咁多年來儲落最多嘅就係居民投訴個案及政府文件，為咗保護私隱同避免內容外洩，好多已經燒毀同碎掉；有用物品同一塊塊嘅牌匾，就運送去其妻龍瑞卿嘅議員辦事處。
陳雲生話，有唔少個案都令佢非常難忘，包括八一年友愛邨發生治安騷亂，居民包圍警察派出所長達三日三夜，由於當時仲未有區議會，最後搵嚟已故前立法局及市政局議員杜葉錫恩先平息到風波。陳雲生任內亦經歷轟動一時嘅屯門色魔案，當時居民自發組成自衞巡更隊，負責護送婦女回家，隊員首先要通過品格檢查，並獲發銀雞、藤棒、頭盔等。此外，九三年虎地泵房水浸致斷水、九五年屯門公路塌石意外等，都令佢印象深刻。
未來將主力培訓新人
陳雲生又話，隨着年代轉變，處理嘅投訴個案亦有唔同，以家庭個案為例，由最初交通不便，婦女要獨自在家管教子女；到後來交通網絡發達，衍生出北上「包二奶」；再轉化至近年老夫少妻、異地婚姻，求助市民一般都會問點搞離婚，但佢認為區議員「寧教人打仔，莫教人分妻」。問到未來工作，佢話好可能係集中帶新人，避免有人中途辭職或只選一屆。
卓妮