正所謂，衰開有條路，香港諸事不順，基建工程延誤超支成為家常便飯，尤其高鐵工程更係問題多多，究竟幾時至可以通車，只能望天打卦。相反，高鐵深圳福田站已於日前如期啟用，意味廣深港高鐵內地路段正式打通，廣深無縫接軌，獨欠香港段，講起都丟架。
作為亞洲最大、全球第二大嘅地下火車站，深圳福田站總面積達十四萬七千平方米，相當於二十一個足球場，都咪話唔誇張。車站分三層，地下一層為轉乘大廳，設有售票及驗票設施；第二層係售票大堂及候車室，可供三千名旅客同時候車。車站啟用初期每日有十一班列車，經深圳北、虎門到廣州南站，車程最快只需四十二分鐘，比原來快一倍。通車首日唔少人專程試坐頭班車，讚不絕口添。
反觀香港就醜怪咯，高鐵工程嚴重延誤超支不特止，完工日期仲一拖再拖。唔怕唔識貨，最怕貨比貨，同一條高鐵，內地段順順利利，香港段甩甩漏漏，簡直相形見絀。
最大嘅問題係，香港高鐵工程超支近二百億元，焗住要向立法會申請追加撥款，弊在今時今日嘅社會及政治環境下，通過撥款談何容易，尤其「一地兩檢」懸而未決，更加頭痕。反對派政客已擺明車馬拉布狙擊，加上今年係立法會選舉年，建制派擔心流失選票，亦未必會咁輕易開綠燈，萬一喺三月死線前唔能夠通過追加撥款，工程隨時爛尾都似。
所以話，高鐵廣深段暢通無阻，唯獨香港段通車無期，簡直佗衰家。呢條高鐵線通車後，本來可以打造「珠三角半小時經濟生活圈」，為香港創造更多發展機遇同空間，可惜阻滯多多，淨係「一地兩檢」問題都被人上綱上線，搞到滿城風雨，唔知點收科。
講起真係令人唏噓，過去香港以高效率高速度見稱，莫講深圳根本冇得比，連新加坡都要偷師，估唔到回歸不過十幾年，香港效率變成議而不決，香港速度淪為拖拖拉拉，周邊城市固然紛紛從後趕上，新加坡更加愈拋愈遠添。喺全國城市競爭力排行榜中，香港話就話仍保住「老二」地位，其實同排第一位嘅上海差距日漸拉闊，而排名第三嘅深圳亦愈追愈貼，隨時後來居上o架。
都係古人講得啱，各有前因莫羨人。人哋一心一意謀發展，香港就全心全意搞鬥爭，加上港府無能，施政混亂，想唔沉淪都幾難。高鐵工程一拖再拖只係一個縮影，最大危機係香港競爭力每況愈下，遲早淪為二三線城市，到時神仙都難救咯！