政情：「根」換招牌 宣傳攻勢博翻身
立法會議員鍾樹根喺區議會選舉敗選，失去東區漁灣選區議席，區議員任期尋日屆滿，有網民前日在社交網站上載一張疑似是樹根於漁灣邨辦事處拆招牌的照片。樹根證實前日早上其職員為其漁灣邨辦事處換招牌，因為佢唔再係區議員，所以要改為立法會議員辦事處。
社交網開新專頁谷人氣
雖然失去區議會議席，但樹根似乎冇氣餒，更決心「洗底」，在本港約一百架的士賣廣告及製作二百五十條橫額宣傳。曾經在敗選後話唔應該忽視網絡攻擊嘅樹根，更履行「喺邊度跌倒，喺邊度起番身」嘅承諾，在社交網站開設「鍾樹根反圍標專頁」，透過網絡提升人氣。
被問到動作多多係咪為今年立法會選舉做準備，樹根就話只係想喺新一年做好宣傳工作，因為「宣傳始終要做」，又話自己同市民都一直關注圍標問題，所以設立專頁，希望可以更好地服務市民。至於會否擔心專頁被惡搞，佢話圍標係市民關心嘅問題，如有人「搞亂檔」，相信亦不會受市民歡迎。