中環出更：廠商會新年派對 展現工廈活力
送舊迎新，派對飲宴特別多。中華廠商聯合會（廠商會）會長李秀恒（Eddy）早前喺旗下葵涌活化工廈KC100舉行派對，城中各大商會高層包括中華總商會會長楊釗、工業總會主席鄭文聰（Daniel）、中華出入口商會前會長莊成鑫等人都去歡聚一番。Eddy特登搵專人喺日本築地魚市場訂咗重達百幾磅嘅巨型吞拿魚，即日由日本直送到港，即劏即食，夠晒新鮮。
喺工廠區開派對，確係好特別，難怪楊釗一到場就喺門口周圍望，Eddy就指手畫腳同佢講解。睇嚟楊釗對呢座新派工廈嘅興趣實大過條魚喇，因為佢係素食者嘛！Eddy就話，以往佢一向喺山頂家中宴客，依家KC100活化啟用後，好多商界朋友都話想嚟參觀，所以索性移師呢度搞派對。
鄭文聰吳國安細數交情
當晚到場嘅政商界人士多，廠商會副行政總裁羅蕙英及會董羅台秦都幫手招呼。卓妮見Daniel同香港電鍍業商會永遠榮譽會長吳國安（安哥）好好傾，皆因兩家人有三代情。安哥話，佢同Daniel嘅爸爸鄭洲相識好耐，因為鄭洲做五金生意，而電鍍同五金息息相關。
雖然依家Daniel轉行做環保，但安哥兒子及Daniel女兒亦係好朋友，呢段跨越三代嘅情誼確係好難得。Daniel就諗起四十幾年前，佢爸爸到土瓜灣生產力促進局班房學電鍍時，佢負責接爸爸放學嘅情景，笑稱電鍍業商會應該頒個老人獎畀爸爸喎！
卓妮