啱啱過去嘅聖誕節假期，本港旅遊業應旺唔旺，市道沉寂，淨係內地團就比去年同期少咗兩三成，零售業收入更暴跌七八成，業界叫苦連天。而展望前景同樣未可樂觀，可謂一片暗淡。究竟點樣先至可以扭轉劣勢，令旅遊業走出寒冬？
當局臨急抱佛腳，尋日同廣州市簽署三份旅遊合作協議，包括「港穗旅遊合作框架協議」、「港穗旅行社合作框架協議」及「優質誠信香港遊」，其中最大嘅賣點係農曆新年前推出「優質誠信香港遊」紅名單，列出服務良好嘅廣州旅行社供旅客參考。紅名單據講有三大指標，包括必須係廣州市內有誠信紀錄嘅旅行社、辦外境遊嘅旅行社、承諾不提供強迫購物團。簡單啲講，即係從廣州九十幾間辦外境遊嘅旅行社中選出四十幾間列入紅名單，以後每年審查，接獲嚴重投訴或涉及惡劣行為嘅旅行社將會被除名。
即係咁，當局終於肯採取措施消除旅遊業亂象，總好過翹埋雙手乜都唔做，但如果認為簽署幾份協議及設立一份紅名單就可以解決問題，咁就太傻太天真喇。係人都知，旅遊業問題由來已久，唔係一朝一夕嘅事，尤其係零團費及平價團亂象，更加係老問題，當局一日唔肯加強監管，無論推出紅名單定黑名單，都係嘥氣嘅咋。
係人都知，所謂「優質誠信香港遊」唔係新鮮事物，二○○六年推出到依家就快十年嘅喇，可惜一直得個講字，當局愈係強調誠信，劏客醜聞就愈多，發展到今時今日，唔止辱罵旅客，甚至搞出人命添。正如古人話齋，世不患無法，而患無必行之法。內地制訂嘅《旅遊法》又好，香港旅議會年前推出嘅十項措施又好，或者係廣州即將設立嘅紅名單又好，可唔可以解決問題，關鍵係當局肯唔肯承擔責任，如果港產官僚繼續懶懶閒，對業界唔監唔管，有法例等於冇法例，講乜都冇用。係呢，當局一早話要成立旅遊業監管局，究竟幾時至成事呢？
一葉知秋，香港旅遊業問題多多，除咗零團費及平價團導致強迫購物之外，旅遊設施不足、缺乏新景點、港幣升值削弱競爭力、激進組織趕客等等，都係令旅遊業步入寒冬嘅主要原因。呢啲內部問題唔解決，根本冇可能吸引旅客，要招待賓客，最少都要打掃屋企先喇，係咪？
所以話，求人不如求己。既然香港旅遊業嘅困境主要係本身造成，就要靠自己撥亂反正，唔可以淨係靠內地出招。正所謂，此地不留人，自有留人處，家陣內地旅客大把地方旅遊及購物，根本冇必要嚟香港貼錢買難受。