過去一年，香港在風風雨雨、紛紛擾擾飄過。政府施政，大事做不了，大型基建工程如港珠澳大橋相關的本地工程、廣深港高速鐵路香港段、西九文化區……不是超支就是延誤，或打孖一齊來；至於小事做不好，則更是一大堆，尤其民生方面，無一不令小市民感到生活艱難。
好似「全民退保」又係得個廢噏，「重中之重」嘅住屋問題更是一塌糊塗。有報告指出，過去一年劏房戶新增了一千二百戶，年升百分之二點四，達到八萬七千多戶，其中五千六百戶更居於板間房和床位等環境欠佳嘅地方。民間關注團體更指出，劏房戶的數量實際應高於估計，推測全港劏房戶達二十八萬戶。
之不過，政府心無百姓，點會學古人「但願蒼生俱飽暖，不辭辛苦出山林」啊！手握公權，就要為民辦事，可是政府政策就係「堅離地」，好搞唔搞走去搞乜嘢「長者富貴屋」，租住權費最平都要成四百萬元，最貴嘅仲要過千萬元，難怪房協被一眾議員炮轟「冇嘢搵嘢嚟做」，應幫嘅人你哋唔幫，退休富貴長者使乜鬼你哋去操勞，你哋又要爭住幫，房協嘅做法，明顯與其為低下階層服務嘅目標背道而馳。
基層生活艱難，政府又實際幫唔到手，公屋輪候冊，除夕過後，新的一年，睇怕會衝破三十萬矣。
今晚嘅除夕煙花倒數匯演，歷時八分鐘，燒銀紙一千三百萬元，出現一百六十個密集式2D笑臉圖案，歷年最多，仲有心形圖案，據講代表對來年充滿希望及活力喎。
然而，香港自佔領運動後已不是個「福地」，勇武抗爭，激進抬頭，香港傳奇不再，浪漫不再，一個讓人難以憧憬的城市，加上黑幫橫行，妖孽為患，法治又不彰，煙花再綻放一千個笑臉又如何，徒惹人更黯然神傷！今夜除夕，老朽還是提早上床發個土豪夢實際啲！